CARA MATRE
di Antonio Martire
Cara mia matre ruce
Tiresina
ccu chissa littera
alla tua rispunnu,
ca tiegnu 'a capu
re pensieri chjina
tutti ammantati re
nu bene funnu.
E oje io te scrivu
finarmente
ca la libera uscita
haju avutu,
ppe premiu mi l'ha
data lu Tenente
pecchì ce fazzu
tuttu senza aiutu.
'E chillu chi
cercavi t'accuntientu
pecchì te mannu na
fotografia,
ca nu cumpagnu mio
de regimentu
mi l'ha fatta ppe
la mannare a tia.
Ccussì tu viri cumu
signu fattu,
si me truovi
'ngrassatu o dimagritu,
pecchì se vire bene
dal ritrattu
puru si 'e sordatu è
lu vestitu.
T'arriccumannu, re
mie sta' squitata
pecchì lluocu è
vascia 'a mangiatura,
ca truovu sempre 'a
tavula parata
e puozzu mangia'
chillu ca me chiura.
Cumu tu sai, io
fazzu lu stallieri
pecchì ccu
l'animali signu amicu
canusciu cumu nullu
lu mestieri
e guoru tantu ch'io
nun te lu ricu.
Ssa fotu mi l'è
fatta 'nsiemi al mulu,
mentre ce staju
faciennu 'na carizza
illu a mmie me
capiscia sempre a vulu
e vene cumu nente
alla capizza.
'Na cosa sula mo te
vuogliu dire,
ca ccu ssa fotu ca
mo io te 'mbio,
te 'nfurmu bene ppe
te fa' capire:
chillu ccu lu
cappiellu signu io.